Tifozët e Kombëtares Shqiptare, të njohur me emrin “Tifozat Kuq e Zi” kanë nisur nje aksion për grumbullimin e ndihmave për zonat e përmbytura nga vërshimet në jug te vendit. Në një njoftim të publikuar në faqen e tyre zyrtare në faceebook, TKZ kane bërë thirrje që kujtdo që ka mundësi të kontribuoj në të mirë të kësaj kauze.
Më poshtë thirrja e tyre e plotë:
“Shqiptarë,
Sot më tepër se kurrë kemi nevojë për shtrirjen e dorës së solidaritet vëllazëror, në Berat, Fier, Vlorë, Sarandë, Delvinë, Gjirokastër, Korçë e Elbasan rreth 5000 hektarë tokë janë mbushur me ujë dhe mbi 400 familje janë evakuuar. Ata kanë nevojë për ndihmën tonë, atyre duhet zgjatur dora për të përballuar këtë situatë.
Tifozat Kuq e Zi kanë nisur aksionin për grumbullimin e ndihmave për familjet e prekura nga përmbytjet dhe ju ftojmë që të bëheni pjesë e këtij aksionit duke dhënë kontributin tuaj.
Ky aksion zgjat 5 ditë, nga data 7 deri më 12 shkurt 2014, dhe ndihmat e grumbulluara do të dërgohen tek njerëzit në nevojë.
Për të dhënë kontributin tuaj kontaktoni përfaqësuesin më të afërt: http://www.tifozatkuqezi.com/perfaqesuesit/
Emrat e kontribuesve do të publikohen pas mbylljes së aksionit.
Tifozat Kuq e Zi ju falenderojnë.”