Kandidati i PBDNJ-së Fredi Bejleri, i akuzuar për vrasje dhe për kontrabandë

Nga Arben Lalla
Prej kohësh deputetët shqiptarë  po diskutojnë për dekriminalizimin e Institucioneve  shtetërore, duke propozuar  një paketë ligjesh. Por ende  njerëz që janë dënuar dikur për vrasje,  terrorizëm apo kontrabandë armësh janë  duke konkurruar fuqishëm në zgjedhjet  vendore 2015. Njëri nga këta persona i  akuzuar për terrorizëm, por i dënuar për  kontrabandë armësh është kandidati për  kryetar të Bashkisë së Himarës, Fredi  Beleri i cili përfaqëson PBDNJ-në dhe  OMONIA-n. Emri i Fredi Belerit nuk lidhet  shumë në dukje me propagandën e shoqatave greke që promovojnë ekstremizmin për aneksimin jugut të Shqipëri, por  ai ka preferuar të jetë nën hije, duke drejtuar çdo aktivitet të tyre për të dalë në  sipërfaqe në kohën dhe vendin e duhur.  Që kur emigroi në Greqi pas vitit 1990,  Fredi Beleri vuri kontakte me grupet ekstremiste greke që luftojnë për aneksimin e jugut të Shqipërisë dhe shpalljen  e Autonomisë. Ai u lidh me Dhimitri Dhimalezin, i cili ishte kryetari i Lidhjes së  Bashkuar Himariotase në Greqi, Babis  Karathanos me origjinë nga Shqipëria,  i cili në atë kohë ishte kryetar i organizatës së Rinisë së Vorio Epirit. Karathanos e prezantoi Belerin me Mitropolitin e Konicës, Sebastianon. Në shkurt  të vitit 1994, Fredi Beleri u takua përsëri  me Mitropolitin Sebastianos dhe po atë  vit qëndroi disa muaj në Qipro, pas masakrës së Peshkëpisë.

Masakra e 10 Prillit 1994, nga terroristët grekë të MAVI-t
Më 10 Prill 1994, rreth orës 3, pas mes-natës, një skuadër paraushtarake me emri “PIRRO”, që i përkiste organizatës terroriste greke e njohur “Fronti Për Çlirim  e Vorio Epirit”- MAVI, e përbërë nga 8  persona, hyri 4 km në territorin e Republikës së Shqipërisë. Ajo sulmoi godinën  ushtarake ku mbetën të vrarë ushtari  i shërbimit Arsen Llazar Gjini, 20 vjeç  nga Semani i Fierit dhe oficerin Fatmir  Sali Shehu, 34 vjeç, nga Tepelena, si dhe  plagosën 3 ushtarë të tjerë. Pasi morën  peng rreth 120 ushtarë, të cilët kur u krye  sulmi, po flinin, grupi terroristë thërriste:  “Këto i keni për Vorio Epirin, ne nuk kemi harruar”. Gjatë largimit skuadra terroriste e MAVI-t, mori me vete 15 automatikë të markës kallashnikov, prodhim kinez dhe dy arka me fishekë. (Sipas  agjentëve që u filtruan në grupin e MAVI-t, pasi dolën nga burgu, u patën thënë se  në fillim vranë ushtarin dhe oficeri, i cili,  duke parë ushtarin e vrarë, u mundua të  merrte armën që ishte në tavolinën e punës, por u qëllua pas shpine). Të nesërmen, më 11 Prill, organizata terroriste MAVI, dërgoi një letër në gazetën  greke “Elefterotipia”, ku merrte përsipër  sulmin ndaj godinës ushtarake brenda  territorit të Republikës së Shqipërisë. Mediat dhe i gjithë aparati shtetëror grek  nuk e pranonin akuzën se ata që kryen  masakrën e 10 Prillit në fshatin Peshkëpi ishin grekë, por e quajtën provokim  nga ana e Shqipërisë. Më 13.4.1994,  gazetarja Kristina Pulidhu botoi një  shkrim në gazetën AVJI, ku aktin terrorist ua ngarkoi kapuçonëve parashtetërorë  të Athinës. Gazeta greke STOXOS botoi me krenari foton e 4 pjesëtarëve të  MAVI-t që morën përsipër masakrën e  Peshkëpisë. Më 19 mars 1995, policia  greke kufitare afër Delvinaqit ndaloi  një veturë dhe një kamion dhe brenda tyre gjeti 6 kallashnikovë me 878  plumba, dy pistoleta Tokaref, me 42  plumba, një radio, një bajonetë, dylbi,  uniforma ushtarake. U arrestuan shtatë  persona që gjendeshin brenda dy automjeteve. Kryetari i grupit, Jorgos Anastasulis, 34 vjeç, shtetas grek (oficer  ushtrie dhe thuhet se ka origjinë nga  Himara), Apostolos Karvelas, 26 vjeç,  shtetas grek (ish-polic rrugor), Marios  Kutula, 25 vjeç, Fredi Beleri, 23-vjeç,  (i cili përdor disa emra si Dionisios dhe  Foti), Jorgo Kristo 26, vjeç, Jorgo Papa,  30, të gjithë këta janë nga Himara si dhe  Harallamb Papa, 21 vjeç, nga Krioneri i  Gjirokastrës. Armët e tjera të organizatës  MAVI, u gjetën në Mars, 1995 në shtëpinë e Andrea Kokaveshit, mjek, 67 vjeçar,  shtetas shqiptar nga Dhërmiu-Himarë.  (Familja Kokaveshi është themeluese e  MAVI-t më 1941, Athanasios Kokaveshi).  Pjesëmarrësit që u akuzuan ishin 7 vetë,  dy grekë dhe 5 minoritarë. Jorgo Anasatasuli, Apostol Karvela, Fredi Beleri, Jorgo  Kristo, Marios Kutula, Harallambo Papa  dhe Jorgo Papa u akuzuan për kontrabandë armësh, të kapur me 7 kallashnikovë më 1995, ndërsa Angjelo Kokaveshi  u akuzua për fshehjen e 7 kallashnikovëve  të tjerë në shtëpinë e xhaxhait të tij, mjekut Andrea Kokaveshi.
Fredi Beleri, 18 muaj në burgun e Koridhalos
Gjykata e Athinës më 21 mars 1996,  dënoi me 4,5 vjet burg, Jorgo Anastasulin, 3.5 vite burg Apostol Karvelën,  dhe shtetasit shqiptarë me nga 3 vjet  burg. Por gjykata e Apelit e reduktoi  dënimin nga 18-20 muaj burg. Pas  përfundimit të gjyqit avokati i tyre  Filoklis Asimakis, thirri: “Rroftë MAVI,  jap 5 milionë dhrahmi për organizatën  e re MAVI”. Pas përfundimit të gjyqit,  kryetari i Lidhjes së Bashkimi i Himariotëve në Greqi, Dhimitri Dhimalezi,  e puthi tërë pasion në buzë, Angjelo  Kokaveshin. Për Dhimitër Dhimalezin  thuhet se ka qenë bashkëpunëtor i  sigurimit grek tradicionalisht. Babai i  tij, Anastas Dhimalezi ka qenë agjent  i sigurimit grek që në vitet 1940 dhe  ka kryer disa misione spiunazhi në Shqipëri gjatë luftës Nacional Çlirimtare  dhe pas saj. Pasi sigurimi shqiptar zbuloi se Anastas Dhimalezi ishte spiun  grek, më 1946, ai mori me vete kur u  arratis për në Greqi djalin e tij, Dhimitrin. Disa vite Dhimitër Dhimalezi u  dërgua për spiunazh në Qipro, pasi erdhi në pushtet partia e majtë PASOK  më 1984, Dhimitri u tërhoq nga veprimet e spiunazhit. Me ardhjen në  pushtet të partisë së djathtë greke  të Konstandin Micotaqis, Demokracia e Re, më 1990, Dhimitri u riaktivizua për spiunazh në Shqipëri. Më  1991, themeloi shoqatën Bashkimi  i Himariotasve dhe filloi stërvitjen e  paraushtarakëve për akte terroriste në Shqipëri. Gjatë kësaj periudhe  Dhimitër Dhimalezi kishte përkrahjen  e plotë të Andoni Samaras, që në atë  kohë ishte ministër i jashtëm i Greqisë. Flitet se një bashkëpunim me  organizatën MAVI, ka patur deputeti  dhe ish-zëvendësministër, Maqis Voridhis, që ka qenë kryetari i partisë  Fronti Nacionalist. Por çelësi kryesor  për lirimin e tyre thuhet se ishte një  deputete dhe ish-ministre e partisë  së Demokracisë së Re. Gjatë procesit  gjyqësor të grupit të MAVI-t dolën të  dhëna se Maqi Voridhi është takuar  me kryetarin e grupit Jorgo Anastasulin në hotelin Zafolia, në Athinë, disa orë pas masakrës së Peshkëpisë.  (Nëse janë nisur ora 5 të mëngjesit  grupi i MAVI nga Delvinaqi, atëherë  i bie të kenë mbërritur në hotel Zafolia rreth orës 12 të drekës). Fredi  Beleri qëndroi 18 muaj në burgun e  Koridhalos. Gjatë qëndrimit në burg  anëtarët e MAVI, u bënë pishman për  atë që kishin bërë dhe të gjithë fajin ja  hodhën Jorgos Anastasulis, i cili ishte  kryetari i grupit. Në periudhën e burgut, midis të burgosurve u infiltruan  agjent të sigurimit grek dhe të huaj,  të cilët donin të mësonin të vërtetën  e MAVI-t. Me ligj, në dhomat e burgut në Koridhalos qëndronin në çdo  dhomë 4 të burgosur. Të akuzuarit e  grupit të MAVI i vendosën të pestë në  një dhomë në katin e sipërm të burgut. Në burg, kryetari i grupit, Jorgo  Anastasuli bënte shoqëri me të burgosurin Vasil Vanalantos, i cili njihej si  vrasës ordiner. Kjo shoqëri nuk shihej  me sy të mirë nga anëtarët e tjerë  të grupit të MAVI-t. Pas disa muajve,  anëtarët e MAVI-t akuzuan kryetarin  e tyre Anastasulin se i kishte futur  në kurth për interesat e huaja dhe jo  greke për sulmin ndaj godinës ushtarake në Peshkëpi. Një ditë, Apostol  Karvelas dhe Mario Kutula, u zunë keq  me Anastasulin dhe shoqëria e tyre u  prish përgjithnjë. Pas daljes nga burgu  të gjithë ata që u akuzuan si pjesëtarë  të MAVI nuk u riorganizuan. MAVI u  harrua dhe aktiviteti i saj u ndal, nuk  foli më njeri për këtë organizatë të  vjetër terroriste. Thuhet se CIA e ndali  riaktivizimin e MAVI-t, duke paralizuar  çdo qelizë të saj.
Beleri, antishqiptar edhe pas burgut
Në 28, Shtator, 2003, Rinia e Partisë  Fronti Nacional (ΕΛΛΗΝΙΚΟΥ ΜΕΤΩΠΟΥ),  që e drejtonte deputeti i sotëm Maqi Voridhis, nderoi me Mirënjohje Himarën  me motivacionin për mbajtjen gjallë të  çështjes kombëtare greke. Në këtë aktivitet ishte i ftuar nderi Fredi Beleri. Më  5.11.2007, ora 18.00, e hënë, u mblod-hën para ambasadës së Shqipërisë në  Athinë përfaqësues të shoqatës Bashkimi  Himariot, të udhëhequr nga Fredi Beleri,  Angjelo Kokaveshi dhe nga deputeti i Ku-vendit grek të partisë LAOS, Athanasios  Plevris, (deri 15 Janar 2015, Athanasios  Plevris ishte deputet i partisë Demokrasia e Re e Andonio Samaras. Athanasios është djali i ekstremistit të njohur  fashist Kostandin Plevris. E gjithë karriera politike e Athanasios i takon babait të tij i cili ka lidhje të ngushta që  në rininë e tij me grupet fashiste greke,  të Agimit të Artë, Frontit Nacional, etj).  Ata protestuan për ligjin 7501 të 1991,  në lidhje me privatizimin e tokave. Më  18 Janar, 2009, Fredi Beleri mori pjesë  në aktivitetin e organizuar nga Revista  PATRIA, e cila nderoi me mirënjohje disa figura ekstremiste greke si: deputetin e LAOS, Makis Voridhis, deputetin  e LAOS, Athanasios Plevris dhe Fredi  Belerin, kryetarin e Bashkimit të Himariotasve. Fredi Beleri, më 19 Janar 2009, në  Athinë, mori pjesë në festën e shoqatës  Rinia e Vorio Epirit, ku ai ishte anëtarësuar që më 1992. Në 8 Shkurt, 2009, Fredi Beleri mori  pjesë në aktivitetin që organizojë partia ekstremiste greke LAOS e Karaxhaferit, me rastin e 50 vjetorit të Autonomisë së Vorio Epirit, ku mbajti edhe  një fjalim provokativ ndaj Shqipërisë.  Në Korrik 2011, Fredi Beleri dhe shumë  drejtues të organizatave ekstremiste  greke u takuan në Janinë, 5 ditë në  Seminarin e Epiriotasve të Botës. Atje  ishin shumë figura ekstremiste greke  si greko-amerikani Nikolla Geixh, Babis Karathanos, etj. Fredi Beleri, para  disa kohësh, deklaroi për gazetën greke  I APOKSI, se Koço Kokëdhima dëshiron  të na përzërë nga Himara. Kjo është një  akuzë e rëndë për deputetin shqiptar  të zonës së Himarës.
Beleri, 3 vjet burg për dhunimin e simboleve shqiptare
Gjykata e Vlorës me numër  224/24.9. 2004 dhe me numër  302/26.12.2006, dënoi në  mungesë me 3 vite burg, Fredi  Belerin, Agjelo Kokaveshin, Koço  Llazarin, Vangjel Kolilan dhe  Sofika Rapon, të cilët në zgjedhjet vendore të 12 tetorit 2003,  dhunuan simbolet shtetërore  shqiptare. Beleri, së bashku me  katër persona të tjerë, u dënuan për veprën penale të “thyerjes së simboleve kombëtare”.  Për këtë dënim, në vitin 2012, ata i drejtuan edhe një letër  Presidentit të Republikës, Bujar  Nishani, ku kërkonin faljen, me  rastin e 100-vjetorit të pavarësisë. Beleri nuk ka vuajtur dënimin nga gjykata, pasi u dënua në  mungesë. Meqë vendimi ka marrë  formë të prerë me vendimin nr.  9 dt. 04.02.2009 nga Gjykata e  Lartë dhe kur ky shtetas nuk është  kapur nga institucionet kompetente për vuajtjen e dënimit, ai  nuk ka të drejtë që të përfitojë  faljen e vuajtjes së dënimit.
/E Vërteta/