Shqipëria, forca për të besuar

Ai gol i Vibes në minutën e 81-të, mund të na ketë zvenitur për momentin shumë dëshira, por dhe ëndrra për të qenë për herë të parë në histori, me 6 pikë pas dy ndeshjeve të para e për ta parë Europianin, jo vetëm me sytë e shpresës por dhe ato të realitetit. Entuaziasmit tonë për një tjetër fitore ndaj skuadrës së dytë më të fortë në grup mund t’i ketë prerë disi krahët, por besimin te kjo kombëtare nuk e ka zbehur, madje e ka emëtuar, aq sa duket sikur ai por lëshon rrënjë te secili prej nesh dhe këtë herë nuk bëhet fjalë për diçka të verbër. Ndeshja e fundit me Danimarkën, pas suksesit në Portugali ishte një lloj konfirmimi, se nuk ka më vetëm rezultate historike apo ndeshje sporadike, por ka mbi të gjitha një ndërgjegjësim se mund të arrihet në një finish të madh.
 
Ne tashmë jemi të vetëdijshëm për aftësitë tona, për atë që bëjmë dhe që kërkojmë. Nuk kemi vetëm një shkëndijë të momentit dhe fakti që në dy edicionet e fundit kemi fituar ndaj dy skuadrave të grupit tonë, për më tepër në 

transfertë është tregues se diçka e madhe po zien brenda nesh. Sigurisht që nuk jemi ende favoritët në grupin tonë, për të prerë biletën për në Francë, por jemi të vetëdijshëm për forcën tonë, për mënyrën sesi e kërkojmë rezultatin dhe për skuadrën që kemi. Për herë të parë, dëmtimi i një lojtari me peshë, nuk krijon xhep në skuadër, pasi të gjithë ndihen të rëndësishëm dhe të gjithë janë pjesë e një grupi. Po luajmë si të barabartë ndaj çdo kundërshtari, kemi mësuar të jemi të duruar dhe të mos kalojmë në panik. Taktikisht nuk po shthuremi dhe po ndërgjegjësohemi dita-ditës se ne mund t’ja dalim në cdo sfidë. Dhe ndaj Danimarkës, ndoshta fluturuam përgjysmë, por shqipet janë mësuar të fluturojnë lart dhe si kombëtarja e shqipeve ndoshta dhe për ne ka ardhur momenti që të kapim majat.